ИСРОИЛ КОМПАНИЯЛАРИ БИЛАН ИНВЕСТИЦИЯ ЛОЙИҲАЛАРИНИ АМАЛГА ОШИРИШ МАСАЛАСИ МУҲОКАМА ҚИЛИНДИ

Ветеринария ва чорвачиликни ривожлантириш давлат қўмитасида Ўзбекистон Республикасининг Исроилдаги элчихонаси ташаббуси билан Исроил компаниялари вакиллари иштирокида видеоконференция бўлиб ўтди. 

Унда Ветеринария ва чорвачиликни ривожлантириш давлат қўмитаси раиси ўринбосари С.Бердиқулов, қўмита масъул ходимлари, Ўзбекистон Республикасининг Исроил давлатидаги элчихонаси ваколатли ходими М.Ибодуллаев ва Исроилнинг “LR Group” ҳамда “Agrotec” компаниялари экспертлари иштирок этишди. 

Тадбирда Исроил давлатининг чорвачилик йўналишидаги компаниялари билан ҳамкорлик қилиш, соҳада қўшма инвестицион лойиҳаларни амалга ошириш масалалари муҳокама қилинди. 

Видеомулоқотда Ўзбекистонда чорвачиликни ривожлантириш, жумладан наслли қорамолларни етиштириш, “Ўзнаслчилик” давлат унитар корхонасида парваришланаётган чорва молларининг зотлари, генетик материаллар, буқа уруғларини ишлаб чиқариш ва сақлаш бўйича исроиллик экспертларга маълумотлар берилди. 

Тадбир давомида наслли қорамолларни сунъий уруғлантириш йўли орқали кўпайтириш ва бу борада ўзаро ҳамкорликни йўлга қўйиш масалаларига ҳам эътибор қаратилди. 

“LR Group” компанияси лойиҳа менеджери Ўзбекистонда наслли қорамолларнинг генетик материаллари – буқа уруғлари ва эмбрионлар етиштириш бўйича исроил-ўзбек қўшма генетик марказини ташкил этишга тайёр эканликларини билдирди. 

Шунингдек, Ўзбекистонда чорвачилик соҳасида амалга оширилаётган ислоҳотлар, жумладан фермер хўжаликлари ва чорвадорлар учун субсидиялар ажратилишига доир муҳим ўзгаришлар Исроил экспертларида катта қизиқиш уйғотди. 

Тадбир якунида томонлар бу борада тезкор ахборот алмашиб боришга келишиб олдилар.