ПОЙТАХТИМИЗДА ЧОРВАЧИЛИК МАҲСУЛОТЛАРИ СОТУВИ БЎЙИЧА АХБОРОТ

Хабарингиз бор, мамлакатимизда COVID-19 коронавирус инфекциясига чалинган илк бемор аниқланиб карантин эълон қилингач, пойтахтимизда чорвачилик маҳсулотлари тақчиллиги юзага келиши ва заҳираси хусусида турли хил асоссиз маълумотлар пайдо бўлган эди.

Шу боис, Ветеринария ва чорвачиликни ривожлантириш давлат қўмитаси юртимизда чорвачилик маҳсулотлари тақчиллиги юзага келмаслиги бўйича баёнот бериб, пойтахтимиз бозорларида сотувга чиқарилаётган чорвачилик маҳсулотлари бўйича ахборот бериб боришни йўлга қўйди.

Кеча пойтахт бозорларига ветеринария-санитария экспертизасидан ўтказилиб, истеъмол учун хавфсиз ва яроқли эканлиги кафолатланган 23,31 тонна қорамол гўшти, 5,2 тонна майда шохли мол гўшти, 11,23 тонна товуқ гўшти, 4,09 тонна балиқ, 421800 дона тухум, 14,06 тонна сут ва сут маҳсулотлари ҳамда 513,04 тонна ўсимликка мансуб озиқ-овқат маҳсулотлари сотувга чиқарилди.  

Шунингдек, ветеринария-санитария экспертизаси ўтказиш давомида 158 кг. гўшт, 79 кг. сут, 243 кг. ўсимликка мансуб озиқ-овқат маҳсулотлари ва 1762 дона тухум истеъмолга яроқсиз эканлиги аниқланиб, утилизация қилинди.  

Дарвоқе, пойтахтимиз бозорларида фаолият олиб бораётган ветеринария-санитария экспертизаси хизмати ходимлари орасида ҳам мамлакатимиз миқёсида кенг тарқалган “Биз сиз учун ишдамиз. Сиз уйда қолинг!” челленжди урфга айланди.

Озиқ-овқат хавфсизлиги учун хизмат кўрсатаётган соҳа мутахассислари меҳнати қадрини англаш, карантин қоидаларига амал қилиш ҳар биримизнинг бурчимиздир!