АҚШНИНГ “СHEMONICS” ХАЛҚАРО ТАШКИЛОТИ МЕНЕЖЕРЛАРИ ЎЗБЕКИСТОНДА

Қўмитанинг Самарқанд Ветеринария медицинаси институтида Америка Қўшма Штатларининг “Сhemonics” халқаро ташкилоти Европа ва Осиё минтақаси менежерлари билан учрашув бўлиб ўтди. Унда халқаро ташкилот менежери Френки Козели хоним Самарқанд Ветеринария медицинаси институтининг бугунги ҳаёти, илмий тадқиқотлар, институтнинг халқаро ҳамкорлик алоқалари, грант лойиҳалардаги иштироки ва келгуси режалари билан қизиқди.
Учрашув давомида институтда Кластер тизимини жорий этиш юзасидан амалга оширилаётган ишлар халқаро мутахассисларда катта қизиқиш уйғотди. Келгусидаги грант лойиҳаларни амалиётга тадбиқ этиш бўйича фикр-мулоҳазалар билдирилди.

 
Таъкидлаш жоизки, “Сhemonics” компанияси агробизнес, саломатлик, фан ва таълим, шунингдек иқтисодиёт ва халқ хўжалигининг турли йўналишлари бўйича инновацион лойиҳаларни молиялаштириш билан шуғулланувчи йирик халқаро ташкилотлар ҳисобланади. Унинг бош офиси Вашингтонда жойлашган бўлиб, дунёнинг 150 дан ортиқ мамлакатлари билан турли грант лойиҳалари бўйича ҳамкорлик алоқаларини олиб боради. Ҳозирда Осиё, Африка ва Лотин Америкаси мамлакатларида компаниянинг 5000 нафардан ортиқ мутахассислари фаолият кўрсатмоқда.
Хорижлик мутахассисларнинг таъкидлашича, халқаро стандартлар даражасига чиқиш учун кўп изланишлар ва янги лойиҳалар талаб этилади. Озиқ-овқат саноатига янги инновацион технологияларни жорий этиш мамлакат иқтисодиётини юксалтиришда имкониятлар эшигини очади.
“Дейлик, минтақада табиий, экологик тоза ва сифатли маҳсулотлар етиштирилади. Сут ва гўшт маҳсулотларининг ички эҳтиёждан ортганини жаҳон стандартлари талабларига мос равишда қадоқлаб, экспорт қилишда замонавий технологияларга эхтиёж сезилади. Бу жараёнда зарур маблағни хорижий грант лойиҳалари қўмаги билан жалб этиш мақсадга мувофиқдир. Таълим ва ишлаб чиқариш интеграциясига алоҳида эътибор қаратилса, имкониятлар икки баробарга ортиши ҳам мумкин”, “Сhemonics” компанияси ана шу имкониятни тақдим этади, – дейди, халқаро экперт Френки Козели.
Бугунги кунда институтда талабалар иккинчи курсдан бошлаб, ўз йўналишлари бўйича хўжалик ва ишлаб чиқариш корхоналарида тажриба ва малакаларини оширмоқдалар.
Мулоқотлар жараёнида институтда таълим ва амалиётнинг ўзаро уйғунлик жиҳатларига ҳам эътибор қаратилди.