ЧОРВАЧИЛИКНИ РИВОЖЛАНТИРИШ БЎЙИЧА БЕЛГИЛАНГАН УСТУВОР ВАЗИФАЛАР ИЖРОСИ ТАЪМИНЛАНМОҚДА

Ветеринария ва чорвачиликни ривожлантириш давлат қўмитаси раиси Б.Норқобилов Андижон вилояти Олтинкўл туманида замонавий типда ташкил этилган “Бахт имкон ривожи чорваси” наслчилик чорвачилик комплексида бўлди ва мавжуд имкониятлар билан танишиб, зарур бўлган амалий ёрдам кўрсатиш бўйича тегишли чоралар кўрилди.

Хўжаликда 2018 йилда 1 минг бош атрофида қорамоллар парвариш қилинган бўлса, бугунги кунга келиб, давлат томонидан чорвачиликни қўллаб-қувватлаш борасида яратилаётган имкониятлардан самарали фойдаланган ҳолда ишлаб чиқариш қувватлари кенгайтириб борилмоқда.

Сўнгги бир йил ичида хўжаликда хорижий давлатлардан келтирилган насллик қорамоллар бош сони 2 минг 230 бошга ва наслли эчкилар сони эса 2 минг 250 бошга етказилиб, замонавий типда қурилган биноларда парвариш қилинмоқда.

Хўжаликда ишлаб чиқаришдаги ветеринария хизмати ташкил этилиб, 8 нафар ветеринария мутахассислари фаолият олиб бормоқда.

Кунлик рационни тайёрлаш компьютерлаштирилган бўлиб, ҳайвонлар учун тузилган кунлик рацион тўйимли концентрат озуқалар, минерал моддалар, микро ва макроэлементлар, витаминлар билан бойитилган ҳолда махсус миксерларда тайёрланмоқда.

Соғиш жараёни ҳам тўлиқ механизациялашган, замонавий типдаги 3 та соғиш залининг 2 таси сигирлар ва 1 таси эчкилар учун мўлжалланган. Бир кунда ўртача 17-18 тонна сут ишлаб чиқарилмоқда.

Хўжаликка жорий йилда Болгария давлатидан қиймати 800 минг АҚШ доллари қийматидаги сутни қайта ишлаш бўйича янги замонавий технология келтирилиб, қуввати бир кунда 20 тонна маҳсулотни қайта ишлашга эга бўлган 11 турдаги маҳсулотни қайта ишлаш мини-заводи ташкил этилиб, ишга туширилди.

Бундан ташқари, чорвачиликни ривожлантириш учун давлат томонидан яратилаётган имкониятлардан кенг фойдаланган ҳолда, хўжалик томонидан жорий йилнинг биринчи ярим йиллигида вилоятнинг Улуғнор туманида янгидан 500 бошга мўлжалланган бўрдоқичилик комплексини ташкил этиш ва ишга тушириш бўйича келишиб олинди.